JAWA POS RADARL MADIUN - Tembang dolanan minangka salah siji wujud kaarifan lokal uga kreativitas masyarakat Jawa.
Saben tembang ana critane lan piweling sing diwarisake saka generasi menyang generasi sabanjure kanggo dilestarekake.
Salah siji tembang dolanan sing lirike prasaja nanging nyimpen makna sing jero banget, yakuwi Kidang Talun.
Kapethik saka pirang-pirang sumber sing diringkes laman Solo Balapan, ngene lirik lan makna tembang bab kidang, tikus lan gajah iki:
Kidang talun…
Mangan kacang talun
Mil kecemil, mil kecemil
Si kidang mangan lembayung
Tikus pithi…
Duwe anak siji
Cicit cuit, cicit cuit
Maju perang wani mati
Baca Juga: WARTA JAWA | Tembang Dolanan Gundhul-Gundhul Pacul minangka Pitutur Luhur kanggo Para Pemimpin
Gajah belang…
Saka tanah mlembang
Nuk legenuk, nuk legenuk
Gedhene meh padha gunung
Baca Juga: WARTA JAWA | Wong Jawa Kudu Weruh, Iki Makna lan Filosofine Tembang Dolanan Cublak-Cublak Suweng
Ing tetembungan Mil kethemil, mil kethemil, si kidang mangan lembayung, piwelinge supaya yen mangan alon-alon lan sithik-sithik.
Kidang nalika mangan godhong kacang alon-alon nggambarake supaya kita duwe watak kang sabar lan ora sembrana.
Ing tetembungan Maju perang wani mati nyritakake tikus cilik sing wani perang sanajan duwe anak.
Iki nggambarake kahanan angele wong cilik sing kudu marsudi supaya panggah urip lan ora gampang nyerah.
Ing tetembungan Nuk legenuk, nuk legenuk, gedhene meh padha gunung nggambarake gajah gedhe sing lakune alon.
Maknane, sanajan kita akeh rejeki panggah perlu waspada lan ati-ati uga wicaksana ing saben tumindak sing kita jupuk.
Watak iki uga penting kanggo ngendhani salah sing bisa ngrugekake awake dhewe lan wong liya.
Inti saka tembang dolanan Kidang Talun iki, supaya kita duwe watak sabar, ora gampang nyerah, waspada lan wicaksana anggone nggayuh gegayuhane urip. (mg2/nda)
Editor : Satmiko Supraptono