KOTA MADIUN, Jawa Pos Radar Madiun – Alas Ronggo Kuning, Kelurahan Ngegong, Kecamatan Manguharjo, Kota Madiun, katon rame Minggu (14/7).
Puluhan lapak jajanan tradisional ngebaki ruang terbuka hijau (RTH) ing sisihe kantor Kelurahan Ngegong iki.
Wiwit gethuk, palapendhem, pecel, bothok, nganti maneka jamu sumadya ing Pasar Jadoel kuwi.
Miturut Lurah Ngegong Ika Kusumaningtyas, pihake pancen kepingin bali menyang swasana jaman biyen liwat jajanan.
Karang taruna lan usaha mikro, kecil dan menengah (UMKM) uga dilibatake. ‘’Ana 30 UMKM,’’ kandhane.
Kanggo nambah swasana jaman biyen uga dianakake praktek mbatik, pojok baca lan dolanan tradisional.
Mangarep uga bakal ditambahi barang-barang antik, kaya sepeda othel lan pameran keris sing digelar saben Minggu ing akir wulan.
Camat Manguharjo Lita Febriana Hapsari nambahi, Pasar Jadoel iki saliyane upaya ngembangake potensi UMKM uga nguri-nguri kaarifan lokal.
Kepala Dinas Tenaga Kerja, Koperasi dan Usaha Mikro (Disnaker-KUKM) Kota Madiun R Andriono Waskito Murti uga ngelem kagiatan iki.
Mangarep, pihake bakal nyurung pasar sing duwe swasana jaman biyen iki ditambahi barang-barang antik.
‘’Supaya UMKM ora mung nyuguhake panganan lan omben,’’ Andriono mungkasi katerangane. (mg1/her)
Editor : Satmiko Supraptono