KAB. MADIUN, Jawa Pos Radar Madiun - Masyarakat Desa Gunungsari, Kecamatan/Kabupaten Madiun, coba nguri-uri budaya Jawa.
Salah sijine manuskrip daun lontar sing didadekake suvenir kanggo para wisatawan sing nekani desa wisata iki.
Sadurunge ana kertas, godhong lontar didadekake salah siji sarana kanggo nulis cathetan (manuskrip) sejarah.
Manuskrip iki coba diuripake lan dilestarekake uga didadekake salah siji objek atraksi wisata ing desa kene.
‘’Budaya manuskrip lontar aksara Jawa iki kita revitalisasi,’’ kandhane Ketua Kelompok Sadar Wisata (Pokdarwis) Desa Gunungsari Bernadi Sabit Dangin wingi (11/8).
Dheweke ngarep-arep atraksi iki bisa ngedukasi generasi muda kanggo nglestarekake budaya Jawa kuwi.
Neng kene pengunjung diajari nulis jenenge dhewe nganggo aksara Jawa ing media godhong lontar.
Pengunjung uga diajak nulis kanthi cara diukir nganggo peso kusus sing butuh katlatenan supaya godhong lontare ora suwek.
Ora mung nganggo aksara Jawa, pengunjung uga dibebasake nganggo aksara lan basa liyane miturut kapinginane.
Uga bisa nulis apa wae sasenenge atine. Wiwit biodata, akta kelahiran, pernikahan, nganti piagam.
Malah pihake nate nampa pesenan aksara Cina. Dheweke nganggep iki minangka akulturasi budaya negara loro.
Saliyane didadekake atraksi wisata budaya, pihake uga nate nggelar Festival Lontar Aksara Jawa.
‘’Nanging durung diterusake jalaran ana kendala anggaran lan SDM kanggo nganakake,’’ Bernadi mungkasi katerangane. (ryu/aan)
Editor : Satmiko Supraptono