MAGETAN, Jawa Pos Radar Madiun – Kaendahan pamandangan Telaga Sarangan, Kabupaten Magetan, rada suda.
Jalaran banyune sing biasane kimplah-kimplah saiki surut akeh. Merga pintu air tlaga iki dibukak wiwit Juni kepungkur.
Iki kandhane Kabid Sumber Daya Air (SDA) Dinas Pekerjaan Umum dan Penataan Ruang (DPUPR) Magetan Yuli Karyawan.
Miturut dheweke, pintu air dibukak kanggo nyukupi kabutuhan pertanian hortikultura lan Pabrik Gula (PG) Rejosari
PG ing Kecamatan Kawedanan iki wis ngesaki ijin saka kementrian sing ana sesambungane ing wayah giling (produksi).
Yuli nyebutake, yen saiki elevasi muka air Telaga Sarangan ana ing volume kira-kira 10,6 meter kibik.
Sawetara wates ngetokake banyu saka tlaga iki mung nganti 7 meter kibik. Nalika pintu air dibukak, posisi awale 14,5 meter kibik.
Nganti tekan saiki, 4 meter kibik banyu wis digelontorake. Kira-kira 6-7 sentimeter utawa 458 liter per detik.
Dheweke uga negesake yen banyu saka Telaga Sarangan iki mung kanggo hortikultura alias ora kanggo nandur pari.
Banyu iki diilekake menyang 11 titik ing tlatah Kabupaten Magetan sing ditanduri hortikultura lan ora butuh banyu akeh.
Antarane ing Kecamatan Plaosan, Sidorejo, Magetan, Ngariboyo nganti PG Rejosari ing Kecamatan Kawedanan.
Estimasi giling PG iki rampung akir wulan iki. Dadi, kira-kira tanggal 25-26 September pintu air bakal ditutup meneh.
Sanajan mengko yen wis ditutup, isih bisa dibukak meneh yen ana petani hortikultura sing mbutuhake.
Nanging sarate kudu ngajokake lan entuk surat ijin panggunaan saka Balai Besar Wilayah Sungai ( BBWS) Bengawan Solo.
‘’Jalaran pintu air bisa dibukak nganti watese 7 meter kibik, supaya banyu tlaga ora nganti garing,’’ Yuli, mungkasi katerangane. (ril/sat)
Editor : Satmiko Supraptono