BOYOLALI, Jawa Pos Radar Madiun – Perengan Gunung Merbabu ing tlatah Kabupaten Boyolali, nyimpen sejarah dawa.
Salah siji bukti sejarah sing isih ana yakuwi Candi Sari ing Desa Gedangan, Kecamatan Cepogo.
Candi iki tinggalane jaman Mataram Hindu kuna sing dadi saksi bisu kajayaane Hindu-Budha Jawa ing abad ka-9.
Yen pingin mrene bisa diwiwiti saka Stadion Kebogiro, Kecamatan Cepogo ngliwati Desa Paras, Sumbung, nganti Gedangan.
Pamandangan padesan kang asri uga aktivitas warga saben dinane, kaya setor susu sapi seger katon sadalan-dalan.
Ing lokasi Candi Sari sing arupa perbukitan iki bisa nyawang Gunung Merapi lan Merbabu ing sisih kulon-lor.
Sawetara sakubenge situs candi iki arupa lahan pertanian kang ijo royo-royo sing bisa ngadhemake mripat.
Candi Sari ora pati gedhe uga mung nyisakake pondasi sing ukurane 4,62 meter x 4,62 meter lan dhuwure pitung meter.
Ing ndhuwure pondasi ana watu andesit cacah papat sing wujude kaya ratna, bagean kas puncake candi Hindu.
Tinggalan arkeologis situs Candi Sari ing antarane lingga-yoni, reca Durga, Ganesa, lan Agastya uga Nandi tanpa endhas.
Tinggalan iki nguatakake identitas Hindu saka lan sing ngira-ngira situs iki saka jaman Mataram Hindu kuna.
Situs Candi Sari iki ditemokake ing jaman kolonial Belanda kira-kira taun 1915 sing kaanane rusak lan ora temata.
Ing 1976 wiwit ana juru pelihara saka Balai Pelestarian Kebudayaan (BPK) Wilayah X Jawa Tengah sing ana kene.
Wektu iki, reca-reca kuwi kasimpen ing Museum Jawa Tengah Ronggowarsito, Semarang, lan BPK Jawa Tengah.
Nanging candi iki tetep karumat kanthi apik lan dadi destinasi wisata populer kanggo edukasi sejarah, lan ibadah Hindu.
Kanggo wisatawan sing pingin nekane destinasi Candi Sari iki ora ditarik tiket mlebu, cukup mbayar parkir.
Saliyane duwe nilai sejarah, pamandangan alam ing sakubenge Candi Sari iki uga endah lan hawane adhem. (rgl/wa)
Editor : Satmiko Supraptono