JAWA POS RADAR MADIUN – Ngabuburit dadi tembung utawa istilah sing familiar ing masyarakat Indonesia. Utamane saben wulan Ramadan
Tembung iki kerep digunakake kanggo nyebutake kagiatan wayah sore sadurunge wektu buka pasa utawa magrib.
Sanajan tembung iki akeh digunakake para nom-noman, nanging uga wis dadi bagean tradisi lan budaya Indonesia.
Asal Usul Tembung Ngabuburit
Tembung ngabuburit asale saka basa Sunda, salah siji basa daerah sing akeh digunakake masyarakat ing Jawa Barat.
Ing basa Sunda, burit tegese sore utawa wektu sadurunge bengi. Yen ing basa Jawa kayadene wektu sadurunge surup.
Mula kanthi cara harfiah, ngabuburit artine kagiatan sing ditindakake wayah sore, persise sadurunge wektu buka pasa.
Nanging, sanajan asal-usule saka basa Sunda, tembung ngabuburit wis dikenal masyarakat saindenge Indonesia, klebu ing Jawa.
Saengga maknane ngembang lan ora mung kusus kanggo kagiatan Ramadan, nanging uga aktivitas sosial budaya liyane sadurunge buka.
Kagiatan nalika Ngabuburit
Umume, kagiatan ngabuburit ditindakake kanthi cara sing nyenengake sinambi ngenteni wektune buka utawa magrib, contone.
- Mlaku-mlaku ing njaba omah: kaya mlaku-malu ing taman, pasar, utawa papan umum liyane kanggo nikmati wayah sore.
- Mburu takjil: takjil utawa panganan entheng sing biasa dipangan sadurunge panganan abot nalika buka pasa. Biasane diburu ing pasar utawa warung dadakan kusus menu buka ing wulan Ramadan.
- Olahraga entheng-enthengan: Ana sing nggunakake ngabuburit kanggo olahraga entheng-enthengan, kaya mlaku santai, nyepedha, utawa yoga supaya awak tetep seger tanpa ngganggu ibadah pasa.
- Kumpul Bareng Kanca lan Kulawarga: ngabuburit uga dadi momen kang apik kanggo kumpul karo wong cedhak. Kena kanggo omong-omongan lan nikmati swasana bebarengan.
Ngabuburit Minangka Tradisi Budaya
Kairing lakune wektu, ngabuburit ora mung dadi momen kanggo ngisi wektu, nanging uga dadi bagean tradisi budaya masyarakat Indonesia.
Akeh acara kanggo ngregengake ngabuburit. Kaya bazar Ramadan, festival kuliner, utawa acara musik lan hiburan liyane.
Tujuane kanggo nglipur masyarakat sinambi ngenteni wayah buka pasa ing wulan Ramadan. Saengga ora mung aktivitas pribadi.
Nanging uga minangka bagean saka kagiatan sosial sing bisa ngraketake tali silaturahmi antarwarga. (*)
Editor : Satmiko Supraptono