JAWA POS RADAR MADIUN – Ora bisa diselaki yen jenate Didi Kempot minangka maestro tembang campursari ing Indonesia.
Ora mung penyanyi, nanging uga pencipta atusan tembang Jawa sing nganti saiki isih akeh ditembangake masyarakat uga penyanyi liya.
Rata-rata tembange duwe tema patah hati, saengga oleh julukan “Godfather of Broken Heart” lan “Bapak Patah Hati Nasional”.
Ciri kas liya ing tembange Didi Kempot akeh sing ngangkat panggonan sing dadi ikone salah siji daerah.
Iki bisa diarani minangka bukti saka “Sewu Kutha” sing wis diliwati, salah siji tembange Didi Kempot sing paling hits.
Klebu pirang-pirang panggonan ing Madiun Raya sing nginspirasi tembange. Salah sijine Prapatan Sleko ing Kota Madiun.
Prapatan Sleko minangka salah siji panggonan sing dadi ikone Kota Madiun, sing saiki isih ana tandhane yakuwi Pasar Sleko.
Jaman biyen ing sakubenge prapatan iki uga ana stasiun kereta api (jurusan Madiun-Ponorogo) lan terminal bis.
Ana sekolah dasar negeri (SDN Sleko) sing wis ganti jeneng dadi SDN 01 Pandean lan menara banyu (PDAM).
Iki cakepan utawa lirik tembang Prapatan Sleko:
Neng kutha madiun tanganmu tak tuntun
Nalika semono neng ati rasane bingung
Janji sedina, lunga ra nganti setaun
Nanging seprene, mulih wis ora purun.
Saben liwat bangjo neng Prapatan Sleko
Pingin nangis eling nalika isih wong loro.
Rina lan wengi kowe tak anti-anti
Neng Madiun tak suwun enggala bali.
Yen wis emoh bali ning aja ngene iki
Mesakna aku sing isih nresnani.
Yen wis emoh mulih neng aja gawe sedhih
Seprene tresnaku ra bisa ngalih.
Neng kutha madiun tanganmu tak tuntun
Nalika semono neng ati rasane bingung
Janji sedina lunga ra nganti setaun
Nanging seprene tanpa kabar lan tembung.
Editor : Satmiko Supraptono