MAGETAN, Jawa Pos Radar Madiun – Omah produksi jajanan khas neng Desa Nitikan, Kecamatan Plaosan, Kabupaten Magetan, saya repot nyedhaki Lebaran.
Jajanan kaya roti bolu kering, roti bolu basah, carang mas, lan likak likuk digawe saben dina.
Herna Ismariani, salah siji produsen jajanan, ngira-ngira cacahe pamudik taun iki bakal luwih akeh.
Dipesthekake oleh-oleh khas uga bakal laris manis, mula perlu diproduksi gedhen adoh sadurunge.
‘’Biasane produksi ora saben dina, kajab roti bolu. Nanging Ramadan iki saben dina mroduksi kanggo setok Lebaran,’’ kandhane wingi (28/3).
Sing disetok jajanan jinis kering, kaya likak likuk, carang mas, lan roti bolu kering.
Yen bolu basah diproduksi saben dina merga mangsa kadaluwarsane mung rong minggu.
Produksine uga luwih akeh dibandhing taun wingi. Saengga cacahe tenaga uga ditambah saka biasane wong loro dadi wong pitu.
Sanajan reregan bahan baku mundhak kabeh, nanging dheweke ora wani ngundhakake rega produke merga kuwatir konsumen lan tengkulak ora gelem.
‘’Alhamdulillah Ramadan lan Lebaran taun iki produksi saya mundhak dibandingake taun wingi,’’ Herna mungkasi kandhane. (ril/sat)
Editor : Satmiko Supraptono